Mother of the Dog Children
ᐹᓪᓕᓂ ᐊᕐᓇᖅᑕᖃᓚᐅᖅᐳᖅ ᐊᕕᓚᔪᕐᒥᑦ. ᐅᐃᖃᕈᒪᖏᓐᓂᖓᓄᑦ ᑕᐃᔭᐅᕙᓚᐅᕆᕗᖅ ᐅᐃᓂᒍᒪᓱᐃᑦᑐᕐᒥᑦ. ᓄᓇᓕᖕᓂᑦ ᐅᔭᕋᒃᑕᖃᖅᑐᓂ ᕿᓪᓕᒐᓛᒃᑐᒥᑦ ᐊᐅᐸᖅᑐᓂ ᖃᐅᓪᓗᖅᑐᓂᒡᓗ, ᑖᓐᓇ ᐅᔭᕋᖅ ᕿᒻᒥᕈᖅᑐᓂ ᐊᕐᓇᕐᓗ ᑖᓐᓇ ᓄᓕᐊᖅᑖᕆᓪᓗᓂᐅᒃ. ᐊᕐᓇᖅ ᐊᒥᓱᓂᑦ ᕿᑐᕐᖏᐅᖅᑐᓂ, ᐃᓚᖏᑦ ᐃᓅᓪᓗᑎᒃ, ᐃᓚᖏᓪᓗ ᖃᓪᓗᓈᖑᓪᓗᑏᒃ, ᐃᓚᖏᓪᓗ ᐃᓄᒐᕈᓪᓕᒐᐅᓪᓗᑏᒃ, ᐃᔨᕋᓪᓗ, ᐊᒻᒪᓗ ᐊᓪᓚᑦ. ᓱᕈᓰᑦ ᓂᐱᓕᒻᒪᕆᐊᓘᕙᒃᑐᑏᒃ ᐊᕕᓛᔫᑉ ᐊᑖᑕᖓᑕ ᕿᔅᓯᒋᓪᓗᓂᒋᑦ, ᑕᕝᕙᓕ ᕿᑭᖅᑕᓕᐊᕈᑎᓪᓗᓂᒋᑦ ᒥᑐᐊᕐᔪᐊᕈᓯᕐᒧᑦ. ᐅᓪᓗᑕᒫᑦ ᐊᕕᓛᔫᑉ ᐅᐃᓂ ᓂᖃᐃᓱᖅᑎᑉᐸᒃᑐᓂᐅᒃ ᐃᒻᒥᓄᑦ ᕿᑐᕐᖓᒥᓄᓪᓗ ᐊᑖᑕᖓᑕ ᐃᒡᓗᖓᓂᑦ. ᑲᒦᖕᓂᒃ ᐅᔭᒥᒑᖅᑎᑉᐸᒃᑐᓂᐅᒃ, ᐊᑖᑕᖓᑕ ᓂᕿᓂᑦ ᑕᑕᑎᖅᐸᒃᑐᓂᒋᒃ ᑖᒃᓱᒪ ᕿᒻᒥᐅᑉ ᕿᑭᖅᑕᓕᐊᕈᑎᕙᒃᑐᓂᒋᑦ.
ᐅᓪᓗᐃᑦ ᐃᓚᖓᓐᓂ ᕿᒻᒥᖅ ᓂᖀᓱᖅᓯᒪᑎᓪᓗᒍ ᐊᖑᒻᒥᒃ ᖃᔭᖅᑐᖅᑐᒥᑦ ᑎᑭᑦᑐᖃᖅᑐᓂ ᕿᑭᖅᑕᒧᑦ, ᐊᒻᒪᓗ ᐅᐃᓂᒍᒪᓱᐃᑦᑐᕐᒧᑦ ᐅᖃᖅᑐᓂ “ᐴᑲᑕᓗᐃᑦ ᓇᒃᓴᕐᓗᒍ ᒪᓕᙵ!” ᑐᖅᑐᓛᖅᑐᓂ. ᑕᑭᔪᒥᑦ, ᐊᖑᑎᑦᑎᐊᕙᖕᒥᑦ ᑕᐅᑦᑐᖃᖅᑐᓂ ᐊᕐᓇᐅᓪᓗ ᐱᐅᒋᓪᓗᓂᐅᒃ. ᐴᑲᑕᓗᓂ ᑎᒍᓪᓗᓂᐅᒃ ᖃᔭᓕᐊᑦᑕᖅᐳᖅ, ᐊᖑᑦ ᐸᐅᓯᑦᑕᖅᐳᖅ ᐃᓚᐅᔨᐊᕆᓪᓗᓂᐅᒃ ᐊᕐᓇᖅ. ᐅᖓᓯᓪᓕᑲᓪᓚᒃᑐᑏᒃ ᓯᑯᖅᑭᐅᑎᐊᕐᔫᖕᒨᕋᒥᑦ ᐊᖑᑦ ᓂᐅᓪᓗᓂ. ᐊᕐᓇᕐᓕ ᑕᕝᕙ ᐅᔾᔨᕈᓱᓯᔾᔫᒥᕗᖅ ᐊᖑᑎᕋᓛᑯᓘᓂᖓᓂᑦ, ᐊᖏᔫᔮᑐᐃᓐᓇᕐᓂᕐᒫᑦ ᐳᖅᑐᔪᒥ ᐃᒃᓯᕚᕋᒥ. ᑕᕝᕙᓕ
ᕿᐊᓕᖅᑐᓂ, ᐊᖑᑦ ᐃᓪᓚᖅᓯᓐᓈᑦ ᐅᖃᖅᑎᓪᓗᒍ “ᐃᒃᓯᕙᐅᑕᕋ ᑕᑯᒐᕕᐅᒃ?” ᖃᔭᕐᒥᓄᑦ ᐅᑎᖅᑐᓂ ᐊᐅᓪᓛᖅᑐᑎᒃ ᑲᔪᓯᒃᑲᓪᓂᓕᕆᓪᓗᑏᒃ.
ᓄᓇᓕᒐᓛᓗᖕᓄᑦ ᐃᒡᓗᒐᓚᒃᑐᓄᑦ ᐃᓄᒋᐊᖕᓄ ᑎᑭᑦᑕᑕᐃᓐᓇᖅᑐᑏᒃ. ᑎᑭᐅᑎᓪᓗᓂᐅᒃ ᖃᒻᒪᕐᒧᑦ ᐱᕕᓂᕋᔭᓂᑦ ᓴᓇᓯᒪᔪᒧᑦ ᐅᖃᐅᑎᓪᓗᒍᓗ ᐱᒋᓂᕋᖅᑐᒍ ᑕᐃᑯᙵᕆᐊᖃᕐᓂᕋᖅᑐᒍᓗ. ᑐᓚᒃᑲᒦᒃ ᐊᕐᓇᖅ ᖃᕐᒪᓕᐊᖅᑐᓂ, ᐊᖑᑦ ᖃᔭᓕᕆᑎᓪᓗᒍ. ᐊᑯᓂᐅᖏᑦᑐᖅ ᐅᐸᒃᑐᓂᐅᒃ ᐊᒻᒪᓗ ᐃᓯᖅᓯᒪᖃᑎᒋᓪᓗᓂᐅᒃ ᐊᓂᓚᐅᕋᑏᒃ ᐅᓪᓗᓂᑦ ᐱᖓᓱᓂᑦ, ᑎᓴᒪᓂᓪᓗᑭᐊᖅ ᓇᑦᑎᕋᓱᒋᐊᓚᐅᖏᓐᓂᕐᒥᓂ. ᐅᐃᑖᖅᑲᐅᖓ ᑎᖕᒥᐊᖑᓐᓂᖅᑐᓂ ᐃᒪᕐᒥᐅᑕᖅ.
ᑕᐃᒃᓱᒪᓂᓪᓗᐊᖅ ᐊᑖᑕᖓᑕ ᐅᐃᕕᓂᕈᓗᐊ ᑕᐃᓐᓇ ᕿᒻᒥᖅ ᐃᒡᓗᒥᓄᑦ ᕿᒪᖕᓂᖅᑐᓂᐅᒃ ᕿᑭᖅᑕᒧᑦ ᕿᓂᕆᐊᖅᑐᓂᐅᒃ. ᓇᓂᖏᓐᓇᒥᐅᒃ ᐅᑎᖅᑐᓂ ᕿᒻᒥᕐᓗ ᐅᖃᐅᑎᓪᓗᓂᐅ ᐅᑕᖅᑭᖁᓪᓗᓂᐅᒃ ᐸᓂᓂ ᕿᓂᕆᐊᕐᓂᐊᕋᒥᐅᒃ. ᐊᐅᓪᓚᖅᑐᓂ ᐅᒥᐊᑯᔅᓱᕈᓗᒃᑯ ᐊᒻᒪᓗ ᐊᑯᓂ ᐊᐅᓪᓚᖅᓯᒪᓪᓗᓂ ᓄᓇᓕᒐᓛᓗᖕᓂᑦ ᐊᖁᓵᖅᓯᓕᖅᑐᓂ ᑭᓯᐊᓂ ᐸᓂᓂ ᓇᓂᑦᑕᑕᐃᓐᓇᖅᐹ. ᖃᕐᒪᒐᓛᓗᖕᓂᑦ ᑕᑯᓪᓗᓂ, ᐅᒥᐊᕐᒥᓃᖏᓐᓇᖅᑐᓂ ᑐᖅᑐᓛᑦᑕᖅᐳᖅ ᐸᓂᖕᒥᓄᑦ ᐊᖏᕐᕋᐅᖃᑎᒋᔪᒪᓪᓗᓂᐅᒃ. ᖃᕐᒪᕐᒥᓃᙶᖅᑐᓂ ᖃᐃᕗᖅ ᐃᑭᓪᓗᓂᓗ ᐊᑖᑕᖓᑕ ᐅᒥᐊᖓᓄᑦ ᐃᔨᖅᑐᓂ ᓴᐅᓪᓗᒍ ᐊᒥᕐᓄᑦ.
ᐊᑯᓂᐅᖏᑦᑐᖅ ᐊᐅᓪᓚᖅᓯᒪᑎᓪᓗᒋᑦ ᐊᖑᒻᒥ ᖃᔭᖅᑐᖅᑐᒥᑦ ᑕᑯᓪᓗᑏᒃ, ᐅᐃᑖᖅᑲᐅᖓ
ᑕᐃᓐᓇᐅᓪᓗᓂ. ᕿᓚᒥᑯᓗᒃ ᐊᖑᓪᓗᓂᒋᒃ; ᓴᓂᕌᓐᓄᕋᒥ ᐊᐱᕆᓪᓗᓂᐅᒃ ᒪᒃᑯᒃᑐᖅ ᑖᓐᓇ ᐊᕐᓇᖅ ᐊᒡᒐᖏᑦ ᓴᖅᑭᑎᖁᓪᓗᓂᒋᒃ, ᑕᑯᔪᒪᓕᖅᑖᓗᒋᒐᒥᐅᒃ, ᑎᒥᖓᑕᐅᓃᑦ ᐃᓚᐃᓐᓇᑯᓗᐊᓂᑦ; ᑭᓯᐊᓂ ᓅᓐᓇᓂ. ᐳᐊᓗᖓᓂᑦ ᑕᑯᔪᒪᓕᕆᓪᓗᓂ, ᑭᓯᐊᓂ ᐃᖅᑯᓪᓕᕐᕕᒋᒻᒥᓇᓂᐅᒃ ᐱᔪᒪᔭᖓ. ᖃᓄᕈᓘᔮᓗᒃ ᓴᖅᑭᑎᓐᓇᓱᒃᑲᓗᐊᖅᑐᓂᔾᔪ; ᐃᔨᖅᓯᒪᐃᓐᓇᖅᑐᓂ. ᑖᓐᓇ ᕿᐊᓕᖅᑐᓂ, ᓂᐊᖁᓂ ᑕᓕᕐᒥᓅᖅᑐᒍ, ᖃᔭᐅᑉ ᐹᖓᑕ ᖁᓛᒍᑦ. ᐊᕕᓚᔫᑉ ᐊᑖᑕᖓ ᐃᐳᕖᙵᑦᑎᐊᓕᖅᑐᓂ, ᐊᖑᓪᓗ ᕿᒪᒃᑖᓘᓪᓗᓂ.
ᐃᒪᑦᑎᐊᕆᒃᑐᐊᓘᒻᒪᑦ ᐊᖏᕐᕋᐅᖏᓐᓇᖅᑐᑏᒃ. ᖃᖓᙳᑲᓪᓚᒃᑎᓪᓗᒍ ᑭᓱᒥᑭᐊᖅ ᐊᒡᒋᖅᑐᒥᑦ ᐅᒥᐊᖓᓐᓄᑦ ᑕᑯᓪᓗᑏᒃ. ᓱᖅᑯᐃᖅᑕᐅᑦᑎᐊᕈᓐᓇᕋᓂ. ᐊᖑᑦ ᖃᔭᕐᒦᑦᑑᔮᓕᖅᐸᒃᑐᓂ. ᐃᓛᓐᓃᑦ ᑎᖕᒥᐊᕈᓘᔮᓕᖅᐸᒃᑐᓂ. ᖃᖓᑕᓪᓗᓂ ᖁᑦᑎᒃᓯᐅᒥᔭᒃᑐᓂ, ᐊᒃᐸᐅᒥᕙᒃᑐᓂ, ᐃᒫᒍᑦ ᐃᖏᕐᕋᑦᑎᐊᖅᑐᐊᓘᓕᖅᐸᒃᑐᓂ. ᐅᒥᐊᖓᓐᓄᑦ ᐊᙳᑎᑦᑕᑕᐃᓐᓇᕋᒥ ᖃᔅᓯᐊᖅᑎᑲᓪᓚᒃᑐᒍ ᑲᐃᕙᑐᐃᓐᓇᑲᐃᓐᓇᖅᑐᒍ ᐊᓯᐅᑲᓪᓚᒃᑭᓪᓗᓂ. ᑕᕝᕙᓕ ᒪᓕᒃᑖᖅᐸᓪᓕᐊᓯᑳᓪᓚᒃᑐᓂ, ᐃᒪᖅᑯᖅᑐᓯᓯᔪᐊᓘᓪᓗᓂ, ᐊᑯᓂᐅᖏᑦᑐᕐᓗ ᐊᓄᕌᖅᑐᐊᓘᓕᖅᑐᓂ. ᓄᓇᒧᓪᓗ ᐅᖓᓯᒃᑐᕈᓘᓪᓗᓂ ᐅᒥᐊᖅ. ᐃᑦᑐᕈᓗᒃ ᐃᐱᓂᐊᖅᑐᕆᓪᓗᓂ ᑲᑉᐱᐊᓱᓕᖅᑐᓂ; ᐊᒻᒪᓗ ᑲᑉᐱᐊᓱᒃᑐᓂ ᓂᖓᐅᖓᑕ ᐊᑭᒋᐊᕐᓂᐊᕐᓂᐊᓗᐊᓂᒃ ᐃᒫᓄᑦ ᐃᒋᑦᑕᖅᐹ ᐸᓂᓂ. ᓴᓂᕌᓄᑦ ᓇᔪᒻᒥᓕᖅᑐᓂ; ᐊᑖᑖᑕ ᐅᓕᒪᐅᑎᓂ ᑎᒍᓪᓗᓂᐅᒃ ᐃᓄᒐᙳᐊᖏᑦ ᓯᕗᓪᓕᖅᐹᑎᒍᑦ ᓇᑲᑦᑕᖅᐸᐃᑦ.
ᐃᒫᓄᒃ ᑲᑕᒃᑲᒥᒃ ᓴᖅᐱᓕᙳᖅᑐᑎᒃ, ᑯᑭᖏᑦ ᐊᕐᕕᖕᒧᑦ ᓴᐅᓂᙳᖅᑐᑎᒃ. ᓱᓕ ᐅᒥᐊᕐᒧᑦ ᓇᔪᒻᒥᓪᓗᓂ; ᐊᑏᓗᒃᑲᓐᓂᖅ, ᐅᓕᒪᐅᑎᓂ ᑎᒍᓪᓗᒍ ᐃᓄᒐᙳᐊᖏᑦ ᑭᖑᓪᓕᖅᑎᒍᑦ ᓇᑲᑦᑕᕆᕙᐃᑦ. ᑕᐃᒃᑯᐊ ᐅᒡᔪᙳᖅᑐᑏᒃ. ᑕᒪᑐᒪᓂ ᐊᑕᓕᖅᑐᓂ ᐃᓄᒐᙳᐊᖏᑦ ᐱᒋᐊᕐᓃᓐᓇᑯᓗᖏᓐᓄᑦ, ᐊᑖᑕᖓᑕ ᐃᐳᕈᓗᓂ ᐱᓪᓗᓂᔾᔪᒃ ᐃᔩᑦᑕᖅᐹ ᓴᐅᒥᖔᖓᓂᑦ. ᐃᒫᓄᑦ ᓂᕕᐊᓪᓚᑐᐃᓐᓇᖅᑐᓂ ᐊᑖᑕᖓᓗ ᓯᒡᔭᒧᑦ ᐃᐳᓕᖅᑐᓂ.
ᑕᕝᕙᓕ ᑖᒃᑯᐊᒃ ᑲᒦᒃ ᕿᒻᒥᓂᑦ ᐃᓕᙵᔭᐅᔫᒃ ᓂᕿᑕᐅᑎᒋᔭᐅᕙᒃᑲᒥᒃ ᐃᓚᖏᓐᓄᑦ, ᐅᔭᕋᖕᓂᑦ ᑕᑕᑎᖅᑐᓂᒋᒃ ᖄᖏᓐᓇᑯᓗᖏᑦ ᓂᕿᓂᑦ ᐃᓗᓪᓕᖅᑐᓂᔾᔪᒃ. ᕿᒻᒥᖅ ᐳᐃᔾᔭᖅᑐᓂ ᐃᑳᕋᓱᒃᑐᖅ ᐊᕝᕙᖅᓯᓕᕋᓗᐊᖅᑐᓂ ᐅᔭᕋᖕᓄᒃ ᐅᖁᒪᐃᑦᑐᓄᑦ ᐊᖅᑲᐅᔾᔭᐅᑦᑕᖅᐳᖅ. ᑭᕕᕙᓪᓕᐊᓕᖅᑐᓂ, ᐊᒻᒪᓗ ᐃᐱᓐᓂᖅᑐᓂ. ᐃᐱᓕᖅᑎᓪᓗᒍ ᓂᐱᐊᓗᖕᒥᑦ ᑐᓴᖅᑐᖃᕐᓂᖅᑐᓂ. ᐊᑖᑕᖓ ᑐᖅᑭᖅᑎᖅᑐᓂ ᐊᒻᒪᓗ ᓯᒡᔭᓕᐊᖅᑐᓂ ᑎᓂᙵᑎᓪᓗᒍ. ᑕᒫᓂᓗ ᓇᓪᓚᖅᑐᓂ ᑐᐱᕐᒥᓄᓪᓗ ᐅᓕᒃᑐᓂ. ᐅᓗᔾᔭᐅᓪᓗᓂ, ᐊᒻᒪᓗ ᑎᓂᒃᑲᓐᓂᕋᓗᐊᕐᒪᑦ ᐱᑕᖃᕈᓐᓃᖅᑐᓂ.
ᐊᕐᓇᖅ ᓯᐊᑦᓇᙳᖅᑐᓂ, ᐃᓂᖃᖅᑐᓂ ᐊᒃᑎᓐᓂᖅᓴᒥ, ᐃᒡᓗᖓᑕ ᐃᓗᐊᓂ ᓴᓇᓯᒪᔪᒥ ᐅᔭᕋᖕᓂᑦ ᐊᒻᒪᓗ ᐊᕐᕖᑦ ᓴᐅᓂᖏᓐᓂᑦ. ᐃᔨᑐᐊᖃᖅᑐᓂ ᐊᒻᒪᓗ ᐱᓱᒍᓐᓇᕋᓂ ᐃᖏᕐᕋᕐᓚᕈᓘᔭᖅᐸᒃᑐᓂ, ᓂᐅᖓᑕ ᐊᐃᑉᐹ ᐊᓪᓕᖅᑭᐅᑎᓯᒪᓪᓗᓂ ᐃᕿᖓᔪᖅ ᐃᓪᓗᐊ ᓯᓚᒻᒧᑦ ᓯᑦᑐᖓᓪᓗᓂ. ᐊᑖᑕᓂ ᐃᒡᓗᒥᐅᖃᑎᒋᓪᓗᓂᐅᒃ ᑐᐱᕐᒧᑦ ᐅᓕᒃᓯᒪᔪᖅ. ᕿᒻᒦᑦ ᑐᖅᓲᖕᓂ ᐃᓂᖃᖅᑐᑏᒃ. (ᕘᐊᔅ, 1901, ᒪᑉᐱᒐᑦ 163-165)
< return to stories
