ᒪᖏᒃᑕᑐᐊᕐᔪᒃ

ᒪᖏᒃᑕᑐᐊᕐᔪᒃ ᓄᓇᐅᑉ ᐃᑭᐊᖓᓂᒥᐅᑕᖅ.

ᑕᐃᒃᓱᒪᓂᐊᓗᒃ ᓄᓇᓕᖕᓂ ᓱᕈᓰᑦ ᐊᓯᐅᕋᖃᑦᑕᓕᖅᑎᓪᓗᒋᑦ, ᖃᐅᔨᒪᔭᐅᓇᑎᒡᓗ ᓇᒧᙶᓕᕋᓗᐊᕐᒪᖔᑕ.  ᐅᓪᓗᐃᑦ ᐃᓚᖏᓐᓂ ᓂᕕᐊᖅᓯᐊᑯᓘᒃ ᐊᓯᐅᖅᑲᓕᕐᓂᖅᐴᒃ ᐊᖏᕐᕋᕋᓱᒃᑲᓗᐊᖅᑐᑎᒃ. ᓂᕕᐊᖅᓯᐊᑯᓘᑉ ᐊᐃᑉᐸᖓ ᐊᒫᖅᑐᐊᖅᑐᑯᓘᓪᓗᓂ.  ᐱᙳᐊᕐᓂᕋᒥᒃ, ᓄᐊᑦᑎᑲᑕᒃᑐᑎᒡᓗ ᑭᓱᑐᐃᓐᓇᕐᓂᒃ, ᑕᐃᒫᓪᓗ ᐅᔾᔨᕆᓇᑎᒃ ᓄᓇᐅᑉ ᐃᑭᐊᖓᓄᑦ ᐹᒧᑦ ᑎᑭᐅᑎᓐᓂᖅᐴᒃ. ᒪᖏᑦᑕᑐᐊᕐᔫᑉ ᐅᔾᔨᕆᒐᒥᒋᒃ ᐃᒡᓗᖓᑕ ᐃᓗᐊᓅᖅᑑᒃ, ᐅᒃᑯᐊᖅ ᒪᑐᕚ.  ᓂᕕᐊᖅᓯᐊᒃ ᑕᑯᓇᓕᕋᒥᒃ ᐃᓗᐊᓂ, ᑕᑯᓪᓗᑎᒃ ᑎᒥᕕᓂᕐᒥᒃ.  ᓂᐊᖁᕕᓃᓪᓗ ᓇᓂᑐᐃᓐᓈᖅᑐᑦ, ᓂᐊᖁᕕᓃᓪᓗ ᓱᕈᕋᒥᒃ ᓱᕐᓗᖏᑦᑎᒍᑦ ᑲᒃᑭ ᐊᓂᐊᓪᓗᓂ.  ᒪᖏᒃᑕᑐᐊᕐᔪᒃ ᐊᑭᒥ ᓵᖓᓂ ᐃᒃᓯᕙᓪᓗᓂ ᓱᕈᓰᒃ ᐃᓯᕐᕕᒋᕋᑖᖅᑕᖓᑕ ᓇᓛᓄᑦ.  ᐅᔭᕋᖕᒥ ᒪᖏᑉᐳᖅ, ᓯᑯᙱᖓᓪᓗᓂ, ᓯᐅᑎᖏᓐᓂᓪᓗ ᒪᑐᓯᒪᓪᓗᓂᒋᒃ ᐊᒡᒐᒻᒥᓄᑦ.

ᓱᕈᓰᒃ ᐅᖃᖅᑐᑎᒃ, "ᐊᒃᓱᑦ ᒪᖏᑦᑕᕆᑦ, ᓯᐅᑏᒃᑭᒃ ᐅᒥᒃᓯᒪᓗᒋᑦ.” ᓂᖏᐅᕈᓗᒃ ᓅᙱᓚᖅ.  ᓱᕈᓰᒃ ᐃᓕᒪᑦᑕᒃᐴᒃ ᑕᒃᓱᒥᖓ, ᕿᒪᕉᑎᒋᐊᖅᑐᑎᒡᓗ; ᐅᒃᑯᐊᕐᓗ ᐅᒥᒃᓯᒪᕗᖅ.  ᖁᓛᓗ ᐊᒻᒪᖅᑕᐅᓇᓱᒍᒪᓕᖅᐳᖅ.  ᓇᑦᑎᐅᓪᓗ ᓴᐅᓂᕕᓂᑯᓗᐊᓂᒃ ᓇᓂᓯᕘᒃ, ᐊᐃᑉᐸᖓᑕᓗ ᓂᕕᐊᖅᓯᐊᑉ ᐊᒡᒐᒍᑎᒋᓕᖅᐹ ᖁᓛᓄᑦ ᐃᒡᓗᕈᓘᑉ.  ᓱᕈᓯᐅᓪᓗ ᐊᐃᑉᐸᖓ ᒪᖏᒃᑕᑐᐊᕐᔫᑉ ᓇᓛᓂ ᓇᖏᕋᓱᐊᖅᑐᓂ ᑖᓪᓕᖅᓯᒪᓇᓱᒃᑐᓂᐅᒃ ᑕᑯᓂᐊᖏᒻᒪᑦ ᖃᓄᐃᓕᐅᕐᒪᖔᑦ.  ᐊᒫᖅᑐᐊᖅᑕᖓ ᐃᓅᑉ ᐊᒡᓕᕈᕕᓂᐊᓂᒃ ᑎᒍᓯᓐᓂᖅᑐᓂ, ᐊᑭᓐᓇᖓᓃᑎᑕᖓᓂᒃ, ᐱᙳᐊᕆᓪᓗᓂᐅᓪᓗ.  ᑕᐃᒪᙵᓕᒫᕐᓗ ᓱᕈᓰᒃ ᖃᐃᒐᓛᑲᑕᖕᓂᖅᐴᒃ ᓂᐱᒃᑭᐅᓪᓗᑎᒃ, ᐊᕐᓇᕈᓗᒃ ᑐᓴᕐᓂᐊᖏᒻᒪᑦ ᖄᖓᓂ ᐊᒻᒪᐃᓇᓱᒃᑎᓪᓗᒋᒃ.

ᒪᖏᒃᑕᑐᐊᕐᔪᒃ ᐅᐃᒑᖓᑦ ᖃᕐᓕᖕᒥᓄᑦ ᐃᔨᖅᓯᒪᔭᐅᓇᓱᐊᖃᑦᑕᑐᖅ ᐊᖕᒪᔪᖅ, ᑕᑯᓂᐊᖏᒻᒪᑦ ᖃᓄᐃᓕᐅᕐᒪᖔᑎᒃ.  ᐊᖕᒪᔪᖅ ᐊᓂᕕᒃᓴᕈᑐᐊᕐᒪᑦ, ᐊᐃᑉᐸᖓ ᐊᓂᖅᑳᕐᓂᖅᐳᖅ, ᐊᒃᑭᖅᑐᓂᐅᒃ ᐊᒫᖅᑐᐊᖅᑑᑉ ᐱᖃᑎᒋᔭᖓᑕ.  ᑕᐃᒪᙵᓕᒫᖅ ᖃᐃᒐᓛᖏᓐᓇᕐᓂᖅᐴᒃ, ᒪᖏᒃᑕᑐᐊᕐᔪᒃ ᑐᓴᖅᑎᑦᑕᐃᓕᒪᓪᓗᒍ ᖃᓄᐃᓕᐅᕐᒪᖔᑎᒃ. ᑕᐃᓐᓇᓗ ᓂᕕᐊᖅᓯᐊᖅ ᕿᒪᒃᑕᐅᕋᑖᖅᑐᖅ ᐊᒃᑮᓪᓗᓂ ᓄᑕᕋᕐᒥ ᐊᖕᒪᔪᒃᑯᑦ, ᖃᕝᕕᕆᓪᓗᓂᓗ, ᐊᓂᓪᓗᓂ ᕿᓗᓪᓗᓂᐅᒃ ᐱᖃᑎᖓᑕ. ᓂᕕᐊᖅᓯᐊᖅ ᑭᖑᓪᓕᖅ ᐊᓂᕋᑖᑦᑎᐊᖅᑎᓪᓗᒍ ᐃᒡᓗᕈᓗᐊᓂᒃ, ᒪᖏᒃᑕᑐᐊᕐᔪᒃ ᖃᐅᔨᓪᓗᓂ ᐊᓐᓇᐃᓕᖅᑕᖏᒃ.  ᓂᕕᐊᖅᓯᐊᓪᓗ ᐊᑯᐊᓂᒃ ᑎᒍᓯᓪᓗᓂ, ᑭᓗᐊᕐᒪᑦ ᐲᖅᑐᓂ.  ᓱᕈᓰᒃ ᐊᓂᒐᒥᒃ, ᐅᓪᓚᕕᐅᑎᑦᑐᑎᒃ ᐅᓪᓚᒍᓐᓇᕐᓂᓕᒫᕐᒥᓂᒃ.

ᒪᖏᒃᑕᑐᐊᕐᔪᒃ ᐃᑦᑐᐊᖅᑐᓂ ᐊᖕᒪᔪᒃᑯᑦ, ᖃᐃᒐᓛᖅᑐᓂᓗ, ᒪᖏᒃᑕᑐᐊᕐᔪᒃ "ᐊᐃ’, ᐅᑎᕆᑦᑎᒃ! ᐋᓐᓂᔾᔮᖏᒃᑭᒃᓯᒃ. ᐄᓛᒃ, ᖃᐅᔨᒪᒐᔅᓯᒃ ᕿᒪᕉᑎᔭᕆᐊᒃᓴᖅ ᐃᒡᓗᓐᓂᑦ."

ᑭᓯᐊᓂ ᖃᐃᒐᓛᖅᑎᓪᓗᒍ, ᐅᓕᒪᐅᑎᓕᔭᖅᐳᖅ ᐊᒡᒐᖏᓐᓂᒃ.  ᓂᕕᐊᖅᓯᐊᓪᓗ ᐊᖏᕐᕋᒧᑦ ᑎᑭᐅᑎᒐᒥᒃ, ᐅᓂᒃᑳᕐᓂᖅᐴᒃ ᑕᑯᖅᑲᐅᔭᖏᓐᓂᒃ, ᐃᓄᐃᓪᓗ ᖃᐅᔨᓪᓗᑎᒃ ᕿᑐᕐᖓᖏᑦ ᖃᓄᐃᓕᓐᓂᕐᒪᖔᑕ.

ᑐᖁᑦᑐᒪᓕᕐᓂᖅᐹ ᒪᖏᒃᑕᑐᐊᕐᔪᒃ.

ᐊᖑᑏᑦ ᐊᒃᖢᓈᒡᒋᖅᑐᑎᒃ, ᓂᕕᐊᖅᓯᐊᒃ ᒪᓕᓕᕐᓂᖅᐹᒃ, ᓯᕗᓂᐊᓂ, ᓄᐊᑦᑎᓪᓗᑎᒡᓗ ᐱᙳᐊᒃᓴᒥᓐᓂᒃ ᒪᓂᖅᑲᒥᑦ.  ᐊᓱᐃᓪᓛᒃ ᖃᐅᔨᓕᕐᓂᖅᐳᑦ ᒪᖏᒃᑕᑐᐊᕐᔪᑉ ᐹᖓᓃᓕᖅᑐᑎᒃ.  ᐊᖑᑎ ᐊᑕᐅᓯᖅ ᐃᓯᕐᓂᖅᑐᓂ, ᐊᒃᑐᓈᑉ ᐃᓱᐊᑕ ᐃᒡᓗᐊ ᑎᒍᒥᐊᖅᑐᒍ, ᐃᓚᖏᑦ ᐊᓃᖅᑎᓪᓗᒋᑦ, ᐃᓱᐊᑕ ᐃᒡᓗᐊᓂ ᑎᒍᒥᐊᖅᑐᑎᒃ. 

ᐊᖑᑦ ᐃᓯᕋᑖᖅᑐᖅ ᓴᖅᐱᓕᒐᓱᒃᑎᑦᑎᐊᕙᐅᓐᓂᖅᐳᖅ; ᐃᓄᐃᓪᓗ ᐃᓯᓕᖅᑎᓪᓗᒍ ᐅᖃᕐᓂᖅᑐᑎᒃ, " ᐊᖑᑎ ᑖᓐᓇ ᓴᖅᐱᓕᒋᐊᒃᓴᖅ ᖃᐅᔨᒪᕙ? ᐃᓯᒃᑲᑎᑦ ᑯᑮᔭᓚᐅᕐᓕᒋᑦ."

 ᑕᕝᕙᓕ ᒪᖏᒃᑕᑐᐊᕐᔫᑉ ᐃᓯᒃᑲᓂ ᑐᓂᓪᓗᓂᒋᑦ ᑯᑮᔭᖅᑕᐅᓂᐊᕐᒪᑕ.

ᐅᖃᖅᑐᓂ, "ᐃᓯᒃᑲᒃᑲ ᑯᑮᔭᕐᓂᐊᕈᕕᒋᑦ, ᑯᒪᒃᓯᐅᕐᓂᐊᖅᐸᕋ ᓂᐊᖁᐃᑦ;" ᐅᖃᓪᓚᒃᐸᓪᓕᐊᓪᓗᓂ, ᐅᓕᒪᐅᑎᕋᓛᓂ ᐃᔨᖅᐹ ᐊᑎᒥᓄᑦ.  ᐊᖑᑎ ᑯᑮᔭᐃᙳᐊᖅᑐᓂ, ᐊᒃᖢᓈᖅ ᕿᓚᒃᐹ ᓂᐅᖓᑕ ᐃᒡᓗᐊᓄᑦ. ᕿᓚᒌᑐᐊᕋᒥᐅᒡᓗ, ᖃᐃᒐᓪᓚᒃᐳᖅ, "ᐱᔭᕇᖅᐳᖅ! " ᒪᑭᑦᑐᓂᓗ.

 ᓯᓚᒦᑦᑐᓪᓗ ᐊᖑᑏᑦ ᓄᓱᐊᖅᓯᓕᖅᐳᑦ ᐊᒃᖢᓈᕐᒥᒃ, ᐊᓂᑕᐅᓕᖅᑐᓂᓗ ᐃᒡᓗᖓᓂᑦ.  ᐊᓂᑕᐅᓕᖅᑎᓪᓗᒍ ᐹᒧᑦ ᑎᑭᐅᑎᑎᓪᓗᒍ, ᐹᑉ ᐊᕙᑎᖏᓐᓄᑦ ᐃᓯᒐᖏᑦ ᐅᓂᒃᑎᒃᐹᒃ, ᐊᖑᑏᑦ ᐊᒃᓱᕈᖅᑐᐊᓘᓪᓗᑎᒃ ᓄᓱᐊᕐᒪᑕ ᓂᐅᖏᒃ ᓇᑲᑕᐅᕘᒃ.

ᐊᖑᑏᓪᓗ ᓱᓕ ᓄᓱᐊᖅᐳᑦ, ᑭᓯᐊᓂ ᒪᖏᒃᑕᑐᐊᕐᔪᒃ ᖃᐃᒐᓪᓚᒃᐳᖅ, "ᐅᖃᐅᑎᓚᒋᑦ!" ᐅᖃᖅᐳᖅ, "ᑕᖅᑑᒃᑲᒃ ᐃᖕᓃᒃ."

ᐃᓄᐃᓪᓗ ᓄᓱᐊᒃᑲᓐᓂᓕᕆᕗᑦ. ᐊᒻᒪᐃᓛᒃ ᖃᐃᒐᓪᓚᒃᑲᓐᓂᖅᐳᖅ, "ᐅᖃᐅᑎᓚᒋᑦ!" ᐅᖃᖅᑐᓂ, "ᐃᓇᓗᐊᒃᑲ ᓴᐸᖓᐅᔮᖅᐳᑦ."

ᐊᖑᑏᓪᓗ ᓄᓱᐊᒃᑲᓐᓂᓕᕆᓪᓗᑎᒃ, ᑭᓯᐊᓂ ᖃᐃᒐᓛᖅᐳᖅ ᓱᓕ, “ᐅᖃᐅᑎᑲᐃᓐᓇᕐᒋᑦ!" ᐅᖃᖅᑐᓂ, "ᑎᖑᒐ ᑲᓐᓄᔭᐅᔮᖅᐳᖅ; ᐆᒻᒪᑎᒐ ᐅᔭᕋᑦᑎᐊᖑᓪᓗᓂ."

ᐊᖑᑏᑦ ᐊᓂᑎᑦᑕᑕᐃᓐᓇᖅᑐᓂᐅᒃ, ᑐᖁᓪᓗᓂ. ᑐᓄᐊ ᓄᖑᓪᓚᒻᒪᕆᒃᑐᓂ ᓄᓱᐊᖅᑕᐅᓂᑯ ᓄᓇᒃᑯᑦ.  ᐱᓚᒃᑕᐅᓪᓗᓂᓗ ᑕᑯᔭᐅᔪᒪᓪᓗᓂ ᐅᖃᖅᑲᐅᔭᖏᑦ ᓱᓕᖕᒪᖔᑕ.  ᐆᒻᒪᑖ ᓇᓂᔭᐅᓪᓗᓂ, ᑎᖑᖓᓗ, ᑕᖅᑐᖏᓪᓗ, ᐃᓇᓗᐊᖏᓪᓗ ᐃᓅᑉ ᐊᔾᔨᑐᐃᓐᓇᖏᑦ.

XXXXXXXXXXXXXX

Bulletin American Museum of Natural History.  [Vol. XV, 1901]  Boas, Eskimo of Baffin Land and Hudson Bay.

 

< return to stories