Sedna

ᑕᐃᒃᓱᒪᓂ ᓄᓇᓕᑐᐊᓂᑦ ᐃᓅᔪᖃᕐᓂᖅᐳᖅ ᐊᖑᒻᒥᒃ ᐊᒻᒪᓗ ᐸᓂᖓ ᓯᐊᑦᓇ. ᓄᓕᐊᖓ ᐊᑯᓂ ᐃᓅᔪᓐᓃᖅᓯᒪᓕᖅᑐᓂ ᐸᓂᒌᒃ ᐃᓅᓐᓇᔭᒃᑐᑏᒃ. ᓯᐊᑦᓇ ᐱᕈᖅᑐᓂ ᐊᕐᓇᑦᑎᐊᕙᒻᒪᕆᐊᓘᓕᖅᑐᓂ ᐊᒻᒪᓗ ᓄᓖᑦᑐᐃᑦ ᓇᑭᑐᐃᓐᓇᖅ

ᑎᑭᑉᐸᖅᑐᑏᒃ ᓄᓕᐊᓂᒍᒪᔭᖅᑐᖅᑐᑎᒃ ᑭᓯᐊᓂ ᐆᒻᒪᑎᐊᓗᐊ ᖃᓪᓕᔭᐅᔪᓐᓇᕋᓂ.  ᑕᕝᕙᓕ ᓯᑯᐃᔭᓕᖅᑎᓪᓗᒍ ᐅᐱᕐᖔᒃᑯᑦ ᖃᖁᓪᓗᖕᒥᑦ ᑎᑭᑦᑐᖃᖅᑐᓂ ᓯᑯᐊᓗᖕᒥᑦ ᖁᓚᐅᑦᑎᔪᒥᑦ ᐊᒻᒪᓗ ᓯᐊᑦᓇ ᐊᖏᖅᑎᑕᐅᓪᓗᓂ ᑐᓴᕐᓂᑐᐊᓗᖕᒧᑦ ᐱᓯᕐᒧᑦ. ᐃᒪᐃᓕᐅᖅᑐᒧᑦ “ᖃᐃᓕᕆᑦ”; “ᖃᐃᓕᕆᑦ ᑎᖕᒥᐊᑦ ᓄᓇᖓᓐᓄᑦ, ᑳᖕᓇᖅᑐᖅᑕᖃᖏᑦᑐᒧᑦ, ᑐᐱᕋᓗ ᐊᒥᑦᑎᐊᕙᐅᓂᖅᐹᓂᑦ ᓴᓇᓯᒪᓪᓗᓂ. ᒥᕐᖑᐃᖅᓯᖃᑦᑕᕐᓂᐊᕋᕕᓪᓗ ᓇᓄᕋᕐᓂᑦ ᓂᕈᒥᓛᓂᑦ. ᐱᖃᑎᒃᑲ, ᖃᖁᓪᓗᐃᑦ ᐱᑖᖅᑎᑦᑎᖃᑦᑕᕐᓂᐊᕐᒪᑕ ᐆᒻᒪᑎᕕᑦ ᑭᙴᒪᔭᓕᒫᖏᓐᓂᑦ; ᓱᓗᖏᓐᓂᑦ ᐊᓐᓄᕌᖃᕐᓂᐊᕋᕕᑦ; ᖁᓪᓖᓪᓗ ᐅᖅᓱᖃᑦᑎᐊᖑᔭᐃᓐᓇᕐᓂᐊᕐᒪᑦ, ᐅᒃᑯᓰᓪᓗ ᓂᕿᓂᑦ ᑕᑕᐅᔭᐃᓐᓇᕐᓗᓂ”. ᓯᐊᑦᓇ ᑕᐃᒫᑦᑎᐊᕚᓗᒃ ᐊᖏᖅᑎᑦᑎᓇᓱᒃᑐᒥᑦ ᐊᖏᙱᐅᔭᕈᓐᓇᐃᓪᓕᒐᒥ ᐃᒫᓗᒃᑯᑦ ᐊᐅᓪᓚᑦᑕᖅᐴᒃ. ᐊᑯᓂᐊᓗᒃ ᐊᐅᓪᓛᖅᑐᑎᒃ ᑕᖃᓇᖅᑐᒃᑯᑦ ᑎᑭᑦᑕᑕᐃᓐᓇᖅᐴᒃ ᖃᖁᓪᓗᐃᑦ ᓄᓇᖓᓐᓄᑦ, ᓯᐊᑦᓇᓗ ᐅᔾᔨᕈᓱᓕᖅᑐᓂ ᐅᐃᒥᓄᑦ ᓯᓚᐃᕐᕆᓂᕐᓗᒃᑕᐅᓂᕐᒥᓂᑦ. ᐊᖏᕐᕋᖅᑖᖅᑲᐅᖓᓗ ᓴᓇᓯᒪᓇᓂ ᐊᒥᑦᑎᐊᕚᓗᖕᓂᑦ ᑭᓯᐊᓂᓕ ᐃᖃᓗᐃᑦ ᐊᒥᕋᕕᓂᐸᔅᓯᐅᕈᓗᖏᓐᓂᑦ ᐊᒻᒪᔪᐃᓐᓇᕈᓗᖕᓂᑦ ᐅᒃᓯᖏᑦᑐᐊᓗᖕᓂᑦ ᐊᓄᕆᒧᑦ, ᖃᓐᓂᒧᓪᓗ. ᐊᐅᒻᒥᑎᖏᓪᓗ ᑐᒃᑐᕋᔭᑯᓘᓇᑎᒃ ᑭᓯᐊᓂᓕ ᑎᓯᔪᐊᓗᐃᑦ ᐊᐃᕕᐅᑉ ᕿᓯᐊᓗᖏᑦ ᐊᒻᒪᓗ ᐃᖃᓗᕕᓂᕐᓗᕈᓗᖕᓂᑦ ᓂᕿᑐᐊᖃᕆᐊᖃᕐᓂᐊᖅᑐᓂ ᑎᖕᒥᐊᓄᑦ ᑎᑭᐅᔾᔭᐅᕙᒃᑐᓂᑦ. ᑐᑭᓯᓵᓕᓪᓗᓂᓗ ᐊᓐᓇᐃᓂᕐᒥᓂ ᐱᐅᔪᕆᓂᐊᓗᖕᒥᓄᑦ ᐃᓄᖕᓂᑦ ᓄᓖᑦᑐᕐᓂᑦ ᐅᐃᓂᓪᓗᐊᖅᐸᓚᐅᕋᓗᐊᕐᓂᕐᒥᓂᑦ. ᕿᒃᓵᒃᑐᓂ ᐃᙱᓕᕐᓂᖅᐳᖅ: ᐋᔮ. ᐊᑖᑕᒃ, ᖃᐅᔨᒪᓐᓂᕈᕕᑦ ᖃᓄᖅ ᕿᒃᓵᒃᑎᒋᒻᒪᖔᕐᒪ ᐊᐃᒐᔭᖅᐸᙵ ᐅᒥᐊᓐᓄᓪᓗ ᐊᐅᓪᓚᑲᐅᑦᑐᕐᓗᓄ ᐃᒫᒍᑦ. ᓂᐅᕐᕈᐊᖑᔪᖓ ᑎᖕᒥᐊᓄᑦ ᑐᙵᓱᐊᑎᑕᐅᖏᓐᓇᒪ; ᐃᒡᓕᕋ ᓂᒡᓚᓱᒃᑐᒥᑦ ᐊᓄᕆᓯᐅᖅᐸᖕᒪᑦ; ᓂᕿᕐᓗᐃᓐᓇᕈᓗᖕᓂᓪᓗ ᖃᐃᑦᑎᔭᐅᕙᒃᑐᖓ. ᐊᐃᓚᐅᙵ ᐊᖏᕐᕋᐅᑎᓗᖓ. ᐋᔮ”.

ᐊᕐᕌᒍᑎᓪᓗᒍ ᐃᒪᖅ ᓂᒡᓚᓱᖏᑦᑐᒧᑦ ᐊᓄᕆᒧᑦ ᒪᓕᒃᑖᖅᓯᒪᓕᕐᒥᑎᓪᓗᒍ, ᐊᑖᑕᖓ ᓄᓇᒥᓂᑦ ᐊᐅᓪᓚᑦᑕᖅᐳᖅ ᓯᐊᑦᓇᒧᑦ ᓂᐅᕐᕈᓪᓗᓂ. ᐸᓂᖓ ᓂᐅᕝᕕᐅᖅᐳᖅ ᖁᕕᐊᓱᒃᑐᒻᒪᕆᐅᓪᓗᓂ ᐊᒻᒪᓗ ᐅᑎᐅᔾᔭᐅᔪᒪᒡᒐᓕᖅᑐᓂ. ᐊᑖᑕᖓ ᑐᓵᓪᓗᓂ ᐸᓂᖓᑕ ᐱᑦᑎᐊᖅᑕᐅᖏᓐᓂᐊᓗᖏᓐᓂᒃ ᐊᑭᒋᐊᕆᐊᒃᓴᖅ ᐃᓱᒪᓕᖅᐳᖅ. ᖃᖁᓪᓗᖅ ᑐᖁᑦᑕᖅᐹ, ᓯᐊᑦᓇ ᐅᒥᐊᕐᒥᓄᐊᕈᑎᓪᓗᓂᐅᒃ, ᐊᐅᓪᓚᑲᐅᑦᑐᖅᑐᑏᒡᓗ ᑕᒪᓐᓇ ᓄᓇ ᕿᒪᒃᑐᓂᔾᔪᒃ ᓯᐊᑦᓇᐅᑉ ᖁᕕᐊᓱᙱᓕᕐᕕᐊᓗᐊ. ᖃᖁᓪᓘᖃᑎᖏᑦ ᐅᑎᕐᒪᑕ ᐃᓚᖓᑦ ᑐᖁᖓᔪᖅ ᖃᐅᔨᒐᒥᒃ ᓄᓕᐊᖓᓗ ᐱᑕᖃᕋᓂ, ᐊᐅᓪᓛᑦᑕᖅᐳᑦ ᕿᓂᕆᐊᖅᑐᑎᒃ ᕿᒫᔪᖕᓂᒃ. ᕿᒃᓵᒍᑎᓕᒻᒪᕆᐊᓘᓐᓂᕐᒪᑕ ᐃᓚᖓᑦᑕ ᐃᓄᐊᖅᑕᐅᓂᖓᓂᑦ ᐅᓪᓗᒥᒧ ᕿᐊᕗᑦ ᓂᕕᐅᖅᑐᑎᒃ.

ᖃᖓᑕᖅᓴᒐᑎᒃ ᐅᒥᐊᖅ ᓇᒦᒻᒪᖔᖅ ᖃᐅᔨᔭᐅᓪᓗᓂ ᓇᓂᔭᐅᓪᓗᓂ ᐊᒻᒪᓗ ᐊᓄᕌᓕᖅᑎᑖᓘᓪᓗᓂ. ᒪᓕᐊᓗᐃᓪᓗ ᐊᖏᓪᓕᔪᐊᓘᓪᓗᑏᒃ ᑖᒃᑯᐊᒡᓗ ᑲᑉᐱᐊᓇᖅᑐᒦᓕᖅᑐᑎᒃ. ᑕᒪᐅᓇ ᐱᒋᐊᓪᓚᒃᓯᒪᓇᖅᑐᐊᓗᒃᑰᖅᑐᑎᒃ ᐊᑖᑕᖓ ᐃᓱᒪᓕᖅᐳᖅ ᓯᐊᑦᓇᒥᑦ ᐃᒫᖅᑎᑦᑎᔭᕆᐊᒃᓴᖅ ᑎᖕᒥᐊᓄᑦ ᑐᓂᕐᕈᑎᒋᓗᒍ. ᐅᒥᐊᑉ ᓯᓈᓄᑦ ᑎᒍᓪᓗᓂ ᓴᒃᑯᐃᓂᐊᕈᓐᓃᖅᑐᒍᓗ. ᐊᑖᑕᕈᓗᐊᓗ ᓴᕝᕕᖅᑐᓂ ᐃᓄᒐᙳᐊᖏᑦ ᓇᑲᑦᑕᖅᐸᐃᑦ ᓯᕗᓪᓕᖅᐹᖏᑎᒍᑦ ᓇᒡᒍᐊᖓᒍᑦ. ᐃᒫᓄᓪᓗ ᑲᑕᒃᑲᒥᒃ ᓴᖅᐱᓕᙳᖅᑐᑎᒃ, ᑯᑭᖏᑦ ᐊᕐᕕᕐᒧᑦ ᓴᐅᓂᙳᖅᑐᑏᒃ. ᓯᐊᑦᓇ ᓇᔪᒻᒥᓕᒃᑲᓐᓂᕆᐊᓪᓚᑐᐃᓐᓇᖅᑎᓪᓗᒍ, ᑭᖑᓪᓖᑦ ᓴᕕᐊᓗᖕᒧᑦ ᑲᑕᒐᖅᑎᑕᐅᑦᑕᕆᕗᑦ ᐃᖏᕐᕋᓯᑦᑎᐊᑐᐃᓐᓇᖅᐳᑦ ᓇᑦᑎᐅᓪᓗᑏᒃ (Pagomys Foetidus);

ᐃᓄᒐᙳᐊᖏᑦ ᑭᖑᓪᓕᖅᐹᖏᑎᒍ ᐊᑖᑕᖓᑕ ᓇᑲᒻᒪᒋᑦ ᐅᒡᔪᙳᖅᑐᑎᒃ (Phoca barbata). ᐃᑯᓪᓚᖅᑐᓂ ᓲᖃᐃᒻᒪ ᖃᖁᓪᓗᐃᑦ ᓯᐊᑦᓇᒥᑦ ᐃᐱᓱᕆᒃᓯᒐᒦᒃ. ᐊᑖᑕᖓᑕ ᐅᒥᐊᕐᒧᑦ ᖃᑭᔪᓐᓇᖅᓯᑎᒃᑭᓪᓗᓂᐅᒃ. ᑭᓯᐊᓂ ᑕᐃᑲᙵᑦ ᐊᑖᑕᒥᓄᒃ ᖀᒥᖕᓂᐊᓗᒃᑖᖅᑐᓂ ᐊᒻᒪᓗ ᐊᑭᒋᐊᓛᓪᓚᕆᖕᓂᕋᖅᑐᓂ. ᓄᓈᖅᓯᒪᓕᖅᑐᑎᒃ ᕿᒻᒥᓂ ᖃᐃᖁᓚᐅᖅᑐᓂᒋᑦ ᐊᑖᑕᓂ ᓯᓂᒃᑐᕈᓘᑎᓪᓗᒍ ᐃᓯᒐᒃᑐᖅᑕᐅᒃᑲᖅᑐᓂᐅᒃ ᐊᒡᒐᒃᑐᖅᑕᐅᒃᑲᖅᑐᓂᐅᒡᓗ. ᑕᒪᓐᓇ ᐱᓪᓗᒍ ᐃᓱᒪᓂᕐᓗᖕᓂᖅᐳᖅ ᐃᒻᒥᓂᑦ, ᐸᓂᓂ ᐊᒻᒪᓗ ᑕᐃᒃᑯᐊ  ᕿᒻᒦᑦ ᐊᔪᓕᖅᑎᑦᑎᓚᐅᖅᑐᑦ; ᑕᐃᒃᓱᒪᓂ ᓄᓈᓗᒃ ᒪᑉᐱᖅᑐᓂ ᐃᒡᓗᑯᓗᐊᓪᓗ, ᐊᑖᑕᖓᓗ, ᐸᓂᖓᓗ, ᕿᒻᒦᓪᓗ ᐄᔭᐅᓪᓗᐊᑦᑎᐊᕐᓂᖅᐳᑦ. ᑕᐃᒪᙵᓂᑦ ᐊᓪᓕᕗᑦ ᓄᓇᖓᓐᓂᒥᐅᑕᐅᓕᖅᐳᑦ, ᓯᐊᑦᓇ ᐊᕐᓇᕆᔭᐅᓪᓗᓂ. (ᕘᐊᔅ, 1888, ᒪᑉᐱᒐᑦ 175-177)

 

< return to stories